Dili- Diretór Ezekutivu Centro Nacional Chega!I.P, Hugo Maria Fernandes akompaña husi Diretór Divizaun sira halo enkontru ho Diretór Jerál Dezenvolvimentu Rural (DJDR) Rosito Guterres, hodi deskute programa abitasaun kona-ba halo uma ba sobrevivente sira.
Diretór Ezekutivu Hugo Fernandes informa, enkontru entre Centro Chega! ho DJDR ne’e importante tebes oinsá mak atu bele servisu hamutuk hodi ajusta programa halo uma ba sobrevivente sira iha Ministeriu Administrasaun Estatal (MAE) liu husi Programa Nacional Dezenvolvimentu Suku (PNDS).
“Uma ne’e parte ida husi programa reparasaun ne’ebé halo ho MAE no PNDS”, esplika Hugo iha enkontru ne’ebé hala’o iha Sala Diretór Jerál DJDR, Caicoli, Dili, Kuarta-feira, (26/01/2022).
Nia haktuir, halo uma ba sobrevivente sira nu’udar programa reparasaun ne’ebé fahe ba kategoria 3, ida – programa apoiu uma ba sobrevivente, rua – programa pontual ba sobrevivente no tolu – programa apoiu saúde.
Kritériu ba sobrevivente sira hetan uma mak: ida – sobrevivente vulneravel liu, rua – kondisaun saúde ladi’ak, tolu – kondisaun saúde sobrevivente ladi’ak tantu iha saúde mental no fiziku tanba durante konflitu pasadu hetan torturasaun no violasaun oin-oin.
Tinan 2021, Centro Nacional Chega!I.P servisu hamutuk ho Asosiasaun Vitima Konflitu Politiku Pasadu 1974-1999 halo uma 10 ba sobrevivente sira. Uma 1 hetan ona inagurasaun husi Primeiru Ministru (PM) Taur Matan Ruak iha loron 12 Janeiru 2022) liu ba iha Suku Vatuvou, Postu Maubara, Munisípiu Liquiça. Enkuantu uma 9 sei iha prosesu konstrusaun nia laran.
Entretantu, Diretór Jerál Dezenvolvimentu Rural, Rosito Guterres deklara prontu servisu hamutuk ho CNC hodi ajusta programa abitasaun liu-liu halo uma ba sobrevivente sira iha suku.
Nia subliña, MAE liu husi PNDS halo ona uma ba komunidade kbiit la’ek sira iha suku tanba ne’e, Centro Chega! ajusta programa halo Uma ba sobrevivente sira ne’e di’ak tebes, entaun entre uma sia no sanulu bele fó ba CNC hodi halo uma ba sonbrevivente sira ne’ebé vulneravel liu.
Hanesan Diretór Jerál, sente kontente no apresiza ba servisu Centro Chega! nian kona-ba programa halo uma ba sobrevivente sira no prontu servisu hamutuk ho Centro Chega! atu apoiu programa ne’e di’ak liu tan iha futuru.
Media Chega!