VPM Abertura Festival Literasia Ho Tema “Preserva Memória, Estimula Kultura Lee No Promove Kreatividade Produtiva”

Dili – (21 Maiu 2026), Vise-Primeiru Ministru, Ministru Koordenadór Asuntu Sosial no Ministru Dezenvolvimentu Rural no Habitasaun Komunitaria, no mos Ministru Ensinu Superior Siénsia no Kultura Interinu, Eng. Mariano Asanami Sabino, abertura eventu Festival Literasia ho tema “Preserva Memória, Estimula Kultura Lee No Promove Kreatividade Produtiva”.

Eventu Festival Literasia ne’e organiza husi Centro Nacional Chega!I.P parseria ho United Nations Educational, Scientific and Cultural Organization (UNESCO) no Korea International Cooperation Agency (KOICA), ne’ebé realiza durante loron 3 hahu (21-23 Maiu 2026), iha Antigo Comarca Balide.

Eventu ne’e kompleta ho atividade oin-oin hanesan, atividade Diskusaun Tematiku, Diskusaun Livru, Workshop, Live Painting, Arte ba labarik, Konta ai-knanoik, Deklamasaun Poezia, Feira do livru no Chega! Tour!.

Iha diskursu abertura, Vise-Primeiru Ministru, Ministru Koordenadór Asuntu Sosial no Ministru Dezenvolvimentu Rural no Habitasaun Komunitaria, Eng. Mariano Asanami Sabino destaka importansia husi atividade Festival Literasia, no afirma, Festival Literasia ne’e importante tebes ba joven no estudante atu partisipa hodi aprende istória pasadu liu husi Festival Literasia ne’e atu bele hasa’e koñesimentu.

“Iha Chega! mak ita foin hatene lolos istória, foin hatene lolos vitima, se mak vitima ba rai ida ne’e, kiik sira, labarik kiik sira, se mak atu sai o nia aman, se mak sai o nia inan, sira nafatin sai eroi ba o. Orgullu ba ita nia inan aman katak imi hotu eroi, para konstrui ita nia rai ho esforsu ho badinas ho espiritu eroiku transformasaun ba ita nia rai”, dehan Vise-Primeiru Ministru.

Ida ne’e mak importansia ba alin sira, imi lee barak kona-ba ita nia istória tanba ita nia istória iha valor ne’ebé mak importante tebes. Timor-Leste rai ida kiik ida luta hasoru nasaun boot, ita luta to’o ita hetan ukun rasik-an.

“Tanba sa mak Chega! fo importansia ba memória tanba ita rai kiik ida konsege esforsu manan funu, ne’e mak modalidade saida, modalidade lee, modalidade aprende, modalidade estuda, modalidade disiplina, modalidade hakas-an”, Vise-Primeiru Ministru afirma.

Nia mos enkoraja timoroan sira atu lee nafatin, lee tenke sai ita nia kultura dalaruma ho tiktok ho media ho video ne’ebé mak iha, ho buat hotu fasil dalaruma ita haluha tiha lee, mais lee nia fundamentu para forma ita nia luta iha kakutak lae kakutak hetan fasil deit. Nune’e, Vise-Primeiru Ministru hato’o parabens ba Chega! tanba organiza ona eventu Festival Literasia.

Iha oportunidade ne’e, Diretór Ezekutivu Centro Chega!I.P, Hugo Maria Fernandes esplika, Centro Chega!I.P organiza eventu Festival Literasia iha ámbitu selebrasaun tinan 24 aniversáriu restaurasaun independénsia Timor-Leste nian. Tintinan CNC sempre organiza Festival Literasia ho atividade kiik de’it, maibé tinan ida ne’e ita halo kombinasaun ba loron 3. Ita hahu (ohin-red) i sei remata iha sabadu agora, ho nia tema mak oinsa estimula joven sira, foinsa’e sira atu hatene istória liu husi atividade kreativu sira.

Entertantu, Centro Chega!I.P hala’o atividade Festival Literasia iha mos atividade Night Market “Espaço de Convivio” ho objetivu mak nu’udar espasu seguru no inkluzivu ba sobrevivente no foinsa’e sira hodi halo interasaun, fahe istória no esperiensia, no promove solidariedade através abordajen kriativas no ekonomia komunitária, ho intensaun no foku ba, proporsiona plataforma ba sobreviventes hodi expresa sira nia memória, no esperiensia moris. Promove kriatividade produtivas sobrevivente no foinsa’e sira ba insentiva independensia ekonómika através venda produtu no servisu sira. Sensibiliza foinsa’e kona-ba memória istoriku iha direitus umanus ho forma informal. Konstrui rede solidariedade entre sobrevivente ho foinsa’e sira, no mos hatutan diretamente foinsa’e sira ho kestaun justisa sosial.

Media Chega!.