Misa Memórial Maktoban Pat Walsh Iha Igreza Katedral
Raimundo Sarmento Fraga
Dili – (07 Jullu 2026), Familia bo’ot Centro Nacional Chega!I.P, Asia Justice and Right (AJAR), Instituto Nacional de Desenvolvimento Mão-de Obra (INDIMO), Dili Institute of Technology (DIT) hamutuk ho familia no entidade sira halo misa memoriál ba maktoban Patrick Ernest Walsh (Pat Walsh) iha igreza Katedral Imaculada Conceição, Dili, hodi fo ondra, respeitu no omenajen ba nia memória sira. Misa ne’e prezide husi Pe. Jovito Rêgo de Jesus Araújo no hetan partisipasaun husi S.E Primeiru Ministru (PM), Kay Rala Xanana Gusmão.
Remata misa, kontinua tau aifunan no sunu lilin iha gruta Antigo Comarca Balide,. Alende ne’e,, halo mos vizita no loke kuartu/sala ne’ebé mak Centro Chega! dedika ba maktoban Pat Walsh tanba nia dedikasaun servisu ba direitus umanus iha Timor-Leste. Tributu ne’ebé dedika ne’e, uluk maktoban Pat Walsh uza sai fatin servisu. Hafoin ne’e, kontinua halo refleksaun hamutuk kona-ba nia memória sira.
Diretór Ezekutivu Centro Chega!I.P, Hugo Maria Fernandes hateten, maktoban Pat Walsh nu’udar ema ida ne’ebé nakonu ho determinasaun ba ema barak nia moris, oferese nia-an ba ema barak nia di’ak no mos halo interasaun di’ak ba ema hotu-hotu la’os de’it ba ema ho pozisaun bo’ot, maibé mos ba ema ki’ik sira. Pat nu’udar ema ida ne’ebé kalma no netraliza situasaun. Maske Pat husik ona mundu ida ne’e, maibé nia legadu sira metin nafatin iha povu Timor-Leste nia fuan no neon.
Primeiru Ministru (PM), Kay Rala Xanana Gusmão esplika, Pat Walsh mak ema ida ho konsiénsia sosiál boot ne’ebé iha responsabilidade morál hamriik hamutuk ho Timoroan sira hasoru injustisa. PM Xanana fo sasin katak, durante okupasaun Indonézia, Pat Walsh la tauk defende Timor-Leste to’o hetan independénsia. Hafoin Restaurasaun Independénsia, Pat Walsh kontinua fo kontribuisaun liu husi nia servisu iha Comissão de Acolhimento, Verdade e Reconciliação (CAVR), ne’ebé nia ajuda dokumenta istória Timoroan sira no promove verdade no rekonsiliasaun. Pat mos apoia kriasaun Centro Nacional Chega!I.P atu prezerva memória istórika, promove edukasaun kona-ba direitus umanus no haforsa kultura dame.
Entertantu, Pat Walsh nu’udar ativista direitus umanus Australianu no belun di’ak Timor-Leste nian ne’ebé hakotu iis iha Melbourne, Austrália, iha loron 29 Dezembru 2025 ho idade 83.
