Dili – (28 Outobru 2026), Diretór Ezekutivu Centro Nacional Chega!I.P, Hugo Maria Fernandes ho ekipa simu vizita ofisial Ministra Justisa Portugal, Rita Alarção Júdice ho delegasaun, akompaña husi Embaixadór Portugal ba Timor-Leste, Duarte Bué Alves, iha edifisiu Chega!, Antigo Comarca Balide.
Durante vizita, parte rua hala’o enkontru hodi partilla informasaun. Diretór Chega! esplika kona-ba relatóriu Comissão de Acolhimento, Verdade e Reconciliação (CAVR)-Chega! no mos Comissão de Verdade e Amizade (CVA), no mos introduz mandatu, programa no atividade sira ne’ebé Chega! halo ba asuntu rekonsiliasaun, edukasaun, prezervasaun memória pasadu no reparasaun ba sobrevivente sira mais vulneravel.
Hafoin remata enkontru kontinua halo vizita iha Muzeu Chega! hodi haree direita istória no memória sira ne’ebé prezerva iha Muzeu Chega! inklui vizita sela nakukun nu’udar fatin ba violasaun direitus umanus ba timoroan sira iha periodu okupasaun Indonézia. Alende ne’e, Ministra ho delegasaun hala’o mos vizita ba biblioteka no arkivu foun Chega! hodi haree dokumentus no ekipamentu sira ne’ebé iha.
Ikus husi vizita, Ministra Justisa Portugal, Rita Alarção Júdice husik hela mensajen ne’ebé hakerek iha ekran muzeu Chega! hateten, “A memória do que se passou deve sempre ser prezervada para que os abusos e a violação dos direitos humanos não se repita o povo timorense é um povo bravo e o nosso respeito pela nossa força e resistência não tem limite. Parabens ao Trabalho que aqui dezenvolvem e muito obrigado”.
Nune’e, Embaixadór Portugal ba Timor-Leste, Duarte Bué Alves dehan, “Este museu presta uma tocante homenagen à história de Timor-Leste e tem o importante papel de museu da memória. Obrigado pelo vosso trabalho”.
Entertantu, vizita ofisial Ministra Justisa Portugal, Rita Alarção Júdice ho delegasaun, akompaña husi Embaixadór Portugal ba Timor-Leste, Duarte Bué Alves iha Chega! nu’udar ondra no respeitu ba ita nia istória no kontinua hatudu komitmentu ba parseria ida ne’ebé refleta ba interese nasaun rua nian.
Media Chega!.