Dili – (13 Dezembru 2025), Tinan 2025 nu’udar tinan da-lima atividade Premiu Maria Gorrete Joaquim “Jornalizmu ba Paz” ne’ebé hahu iha tinan 2020. Iha tinan ida ne’e, media tolu mak sai manan na’in, ba kategoria Media Online di’ak liu mak Lafaek News ho titulu reportajen “Ha’u Hamonu Mata-wen Tan Sente La Hakmatek Iha Barraka Fohuk Laran”, Kategoria Media Imprimi di’ak liu mak Jornal Independente ho titulu reportajen “Iha Istoria Ninia Lalatak Okos: Realidade Moris Sobrevivente Ida”, Kategoria Media Eletronika di’ak liu mak GMN TV ho titulu reportajen “Maske Otas Sei Ki’ik Nia Deside Hodi Para Hosi Eskola Tanba Hakarak Sustenta Nesesidade Familia Nian be Moris Kondisaun Vulneravel Hosi Leba Modo Hodi Tama Sai Bairo”.
Serimonia atribuisaun Premiu Maria Gorreti ba manan na’in sira hala’o iha ámbitu komemorasaun loron internasional direitus umanus ba dala-77, ne’ebé realiza iha Centro Chega!I.P, Antigo Comarca Balide, no partisipa hosi Reprezentante Prezidénsia Repúblika atúal Casa Civil Prezidénsia Repúblika, Jesuína Maria Ferreira Gomes, Provedor Direitór Umanos (PDHJ), Virgilho da Silva Guterres “Lamukan”, Prezidente Konsellu Imprensa (KI), Antonio Cesar Mali, entidade jornalista no parseiru sira.
Iha diskursu serimonia atribuisaun Premiu, Diretór Ezekutivu Chega!, Hugo Maria Fernandes destaka, Maria Gorrete Joaquim nu’udar feto eroina foinsa’e ida ne’ebé mak aten brani, sakrifika nia-an ba mate tanba ukun rasik-an. No premiu ida ne’e tau naran Premiu Maria Gorreti Joaquim atu dedika ba nia tanba nia dedikasaun no espiritu luta, ne’ebé hosik hela liafuan murak dehan, “Imi bele koloniza hau nia isin maibé imi sei lakoloniza hau nia espiritu”.
Atribuisaun Prémiu Maria Gorreti Joaquim “Jornalizmu ba paz” nia baze mak relatóriu no rekomendasaun Chega! no Per Memóriam Ad Spem, ne’ebé hakerek kona-ba kontribuisaun hosi jornalista sira durante luta ba libertasaun patria, hahú hosi jornalista Australianu na’in lima hanesan Greg Shackleton, Tony Stewart, Gary Cunningham, Brian Peters no Malcolm Rennie, neʼebé hetan oho hosi militar Indonézia iha Balibo, iha loron 16 Outubru 1975 to’o Jornalista Bernadino, Sander Thoenes no Agus Muliawan ne’ebé hetan oho mós hosi Militar Indonézia no Milisia Pro Autonomia iha tinan 1999.
Premiu Maria Gorreti Joaquim “Jornalizmu ba paz” nu’udar aktu rekoñesimentu estadu no governu nian ba jornalista no ativista sira hanesan meiu ida atu memórializa sira tanba halo sira nia kna’ar iha pasadu liu hosi hakerek no publika ho baze ba lia-loos, paz no justisa.
“Parabens ba vensedor sira iha tinan ida ne’e, hein katak ida ne’e motiva kolega jornalista sira seluk kuandu hakerek notisia sempre ho vizaun ida katak hau halo servisu ida, atu halo nakonu ema nia direitu prinsipal sira nia moris”, Diretór hato’o parabens ba manan na’in sira iha serimonia atribuisaun Premiu Maria Gorrete Joaquim.
Provedór Direitus Umanus no Justisa (PDHJ), Virgílio da Silva Guterres “Lamukan”,hato’o apresiasaun ba servisu Centro Chega!I.P tanba tinan-tinan sempre atribui Premiu Maria Gorrete Joaquim ba media sira.
Ba media sira tenke foku prinsipal kobertura ba asuntu direitus umanus tanba Jornalizmu da paz ko’alia kona-ba dignifika vitima sira, Umaniza vitima sira no jornalizmu da paz tenke buka problema nia abut. No Jornalista sira ne’ebé hala’o kna’ar jornalizmu ba paz tenke iha vizaun ida ba sosiedade ida moris iha dame, sosiedade ida fo previlejiu ba dialogu, sosiedade ida fo previlejiu ba komunikasaun nu’udar meius atu rezolve problema la’os sosiedade ida ne’ebé buka hatun malu.
“Hau nia deseju katak maluk jornalista komunga espiritu ne’ebé Maria Gorrete iha. Se mak simu Premiu iha kalan ida ne’e hau nia deseju katak Premiu ida ne’e sai jornalista ba dame”, Provedor fiar.
Prezidente Konsellu Imprensa (KI), Antonio Cesar Mali esplika, Premiu Maria Gorrete Joaquim sai hanesan inspirasaun ida ba jornalista sira hotu atu muda ona sira nia orientasaun atu halo publikasaun ida ne’ebé mak tane a’as no kontribui ba paz.
Espera katak Premiu ida ne’e bele sensibiliza no enkoraja liu tan jornalista sira atu muda ona sira nia mindset katak ita nia publikasaun sira ne’e lori ema lian laek sira nian para ema hotu bele rona. Premiu ida ne’e la’os rekoñesimentu de’it ba obra jornalistiku nian, maibé mos nu’udar mensajen ida importante ba ita nia publiku katak presiza duni jornalizmu ida ne’ebé iha orientasaun ba paz no direitus umanus.
Reprezente Prezidénsia Repúblika atúal Casa Civil Prezidénsia Repúblika, Jesuína Maria Ferreira Gomes, lori Prezidénsia Repúblika nia naran hato’o parabens ba manan nain sira ne’ebé hetan Premiu Maria Gorrete Joaquim “Jornalizmu ba Paz” ho kategoria online di’ak liu, imprimi di’ak liu no eletronika di’ak liu.
Nia dehena, Premiu Maria Gorrete Joaquim nu’udar memória ba aten brani no dedikasaun nian. CNC I.P estabelese Premiu ida ne’e hodi rekoñese jornalista no media sira ne’ebé kontribui makas ba promosaun lia-loos no direitus umanus.
“Hau lori Prezidente Repúblika nia naran agradese ba CNC ba Diretór Exekutivu, Membru sira, ba Juri no ba Kolaboradór hotu ne’ebé hala’o serimonia ida ne’e sai posivel. Ita boot sira nia servisu sai exemplu ida kona-ba komprimisu ba memória, justisa no sidadania iha Timor-Leste”, Jesuína apresia servisu.
Media Chega!.