Masakre planeadu boot ne’ebé akontese hafoin Konsulta Populár mak Masakre iha Igreja Nossa Senhora do Rosario Suai (Igreja Suai), iha loron 6 Setembru 1999. Masakre ne’e konsidera hanesan asaun asasinatu masál planeadu hasoru populasaun sivílsira. . Masakre ne’e hatudu duni operasaun koordenada entre Militár Indonézia, hanesan KORAMIL Salele, KODIM Suia (Militár Indonézia) no Membru Milisia Laksaur.
Militár Indonézia no Milisia Laksaur hahú asaltu ba Igreja Suai iha tuku 02:30 loro-kraik, Sira soe granada no tiru iha arredores Igreja Suai nian antes tama ba Igreja Suai nia laran hodi halo atake populasaun sira ne’ebé buka protesaun iha ne’ebá. Milisia Laksaur ne’ebé komanda husi Olivio Mendoca Moruk no komandante Milisia MAHIDI lidera husi Cancio Lopes de Carvalho inklui Militár Indonézia ne’ebé komanda husi Komandante KODIM, Letkol Liliek Koes Hadianto, Letnan Sugito no Komandante POLRI Suai Letkol Gatot Subiaktoro.
Sira oho populasaun hamutuk ema na’in atus-rua (200), inklui Padre Hilario Madeira, Padre Tarsisius Dewanto no Padre Francisco Soares. Ema na’in tolunulu (30) seluk Milisia no Militár Indonézia sira oho hafoin atake iha Igreja Suai.