Dili-Centro Nacional Chega!I.P ho Kompañia Niceles Unipessoal L.da hala’o serimónia rituál hodi haree manu urat, no rezultadu hatudu manu urat iha sinál di’ak ba implementasaun projetu konstrusaun foun Centro Nacional Arkivu (CNA) ba Centro Nacional Chega!I.P.
Serimónia ritual lidera husi Lia Nain Alexandre Gonçalves no nia informa katak, objetivu husi serimónia ritual hodi haree manu urat no rezultadu manu urat hatudu sinál di’ak signifika natureza fo ona autorizasaun no fo matak malirin ba implementasaun projetu.
Enkuantu, Diretór kompaña Niceles Unipessoal Lda, Eng. John Lennon konsidera serimónia rituál ne’e importante tebes no rezultadu ne’ebé hatudu iha sinál di’ak hanesan motivasaun no korajen ba kompaña hodi hahu halo servisu.
“Rezultadu husi serimónia ne’e ita haree rezultadu ne’e di’ak. Ida ne’e fó ona rezultadu ba ami para ami mos komesa halo servisu”, tenik Diretór hafoin remata serimónia rituál ne’ebé hala’o iha edifísiu Centro Chega! Antigu Comarca Balide, Dili, Kinta-feira, (13 /01/ 2022).
Tarjetu impelementasaun ba projetu CNA durante fulan 4. Agora iha faze preparasaun hanesan prepara dezeñu no BOQ no sira iha escpert 13, idak-idak mai ho nia skill iha área arsitek, geodetik, elektrik, sanitasi no seluk tan. Hirak ne’e hotu iha nia etapa mak hanesan inception report, intern report, trep final no final.
Entermus kualidade projetu, Diretór Kompaña garante sei hetan kualidade tanba kompaña laservisu mesak maibé sei servisu hamutuk ho ADN no DNU no projetu sei la’o tuir padraun ne’ebé iha. Maibé Diretór mos husu ba CNC atu prepara konsultan ida di’ak hodi halo supervizaun.
Diretór Ezekutivu, Hugo Maria Fernandes agradese tanba rezultadu husi serimónia rituál hatudu sinál di’ak signifika katak natureza fó dalan hodi implementa projetu konstrusaun foun CNA.
Enkuantu, Centro Nacional Chega!I.P, Da Memória À Esperança (Centro Chega!) hamri’ik nu’udar institutu públiku ida ne’ebé estabelese ho dekretu Lei no. 48/2016 no tutela direitamente ba Primeiru Ministru. Centro Chega! nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”. Centro Chega! nia misaun mak: “Harii sentru Pós-konflitu ne’ebé prezerva memória passadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante”.
Media Chega!