Lospalos – (05 Fevereiru 2026), Família boot Centro Nacional Chega!I.P hamutuk ho família matebian halot ona mate isin maktoban Saudozu Eng. Augusto Napoleão Fernandes, nu’udar Ofisiál Servisu Memorializasaun Centro Chega! iha simitériu Titilari, Suku Fuiloro, Postu Administrativu Lospalos, Munisípiu Lautem.
Iha biban ne’e, Prezidente Konsellu Administrasaun Centro Nacional Chega!I.P, Manuel Pereira lori família boot Centro Nacional Chega!I.P nia naran hato’o agradesimentu tanba oferese ona nia ema di’ak ida, hodi servisu hamutuk iha Centro Chega!, nu’udar arkitektura no enjineiru ida ne’ebé dedikadu tebtebes nia an ba Centro Chega! no Timor Leste tomak sei orgullu tanba alin Napo ninia obra boot ida Centru Arkivu Nasional sei inagura iha fulan 1 ka 2 mai i ne’e sei sai obra ida ne’ebé ita sei lahaluha Napo ba oin.
Prezidente KA haktuir, iha plenaria Konsellu Administrasaun ninia, ko’alia ona no sei dedika fatin ida ba Napo, ba ninia profesionalizmu, ninia obra, no buat hotu ne’ebé nia halo ba Centro Nacional Chega!I.P maibé la’os ba CNC de’it, maibé ba Timor laran tomak atu prezerva no rai didi’ak memória istóriku sira ne’ebé ita nia rai liu ona.
Prezidente konta tuir istória maktoban nian, “hau iha istória badak ida ho alin Napo, como hau servisu iha Gabinete Vise Ministru Asuntus Parlamentar (VMAP) ninian, entaun, alin Napo ema ida ne’ebé sempre lori CPV kontratu husi projetu Centro Arkivu, lori ba iha ne’ebá atu hetan aprovasaun husi Vise Ministru.
Iha loron ida dadersan, hau kuandu tama mai kantor liu meia oras hanesan ne’e, alin Napo ba lori dokumentus lubuk boot ida, ami nain rua konsege hase malu iha dadersan. Vise Ministru iha hela plenaria entaun Xefe Gabinete husu nia hein, hein to’o meiudia, iha oras han hau sai mai nia sei tur iha ne’ebá, hau dehan seidauk ba han, nia dehan, sei hein hela, entaun, ami ba han tiha, fila mai lokraik kuanze to’o tuku tolu (15:00) Napo seidauk fila. Napo lori dokumentus boot ne’e hein Vise Ministru seidauk fila tanba sei kontinua plenaria. Entaun hau tama ba laran, hau husu ba Xefe Gabinete ne’e dehan, alin iha liur ne’e seidauk fila, lae hau haruka fila ba lai, orsida ka aban fila fali tanba dokumentus ne’e tenke asina.
Saida mak iha hau nia hanoin kuandu ko’alia kona-ba Napo wainhira hetan asidente susar, liafuan primeiru iha hau nia ulun kona-ba Napo matenek, dedikasaun, hau nunka haree joven ida dedika nia-an ba servisu tomak”.
Media Chega!.