(Dili, 27 Marsu 2024) – Centro Nacional Chega! Instituto Publiku (CNC I.P) organiza enkontru regulár ho parseiru estratejiku sira ba implementasaun rekomendasaun sira husi relatóriu Chega! no CVA (Comissão de Verdade e Amizade) ne’ebé hanaran PMAS (Per Memóriam Ad Spem) ho lian tetun “Husi Memoria Ba Esperansa”.
Objetivu enkontru regulár ne’e, atu disemina informasaun ba malu kona-ba polítika, programa no atividade sira ligadu ba implementasaun rekomendasaun Chega! no PMAS, inklui mandatu Centro Chega! nian. Enkontru ne’e mos nu’udar meius ida atu komunika ba malu kona-ba programa Centro Chega! ho parseiru estratejiku sira nian ba iha elaborasaun prosesu implementasaun.
Enkontru regulár ho parseiru estratejiku ne’e realiza atu halo kolaborasaun servisu ho instituisaun sira atu implementa rekomendasaun Chega! no PMAS liu husi integra no inkorpora relatóriu rua ne’e iha sira nia polítika no programa atu asegura katak, rekomendasaun sira husi relatóriu Chega! no PMAS no mos mandatu Centro Chega! bele la’o ho di’ak.
Tanba ne’e, enkontru regulár ho parseiru estratejiku sira ba implementasaun rekomendasaun Chega! no PMAS halo bazeia ba Rekomendasaun Chega! sita iha pontu 13 kona-ba instituisaun sira ne’ebé sei hatutan Chega! katak, instituisaun sira presiza hatutan relatóriu Chega! tanba ne’e parte ida husi esforsu nasional atu hariii sosiedade ida ne’ebé bazeadu ba rekoñesementu lialoos tempu uluk nian, laiha violensia, rekonsiliasaun no reparasaun.
Relatóriu CAVR ho nia rekomendasaun sira hamutuk 204, komisaun lia loos entrega ba Estadu Timor-Leste no Indonézia iha tinan 2005 liu ba. Tanba relatóriu Chega! ne’ebé produs husi CAVR la hetan rekoñesementu husi Governu Indonezia, mak lideransa Timoroan sira kontinua hatudu sira nia matenek liu husi harii tan komisaun bilateral entre nasaun rua (Timor-Leste no Indonezia) ne’ebé hanaran Comissão de Verdade e Amizade (CVA).
Hafoin estabelesementu komisaun bilateral ida ne’e, komisaun hala’o nia servisu durante tinan tolu ne’ebé foku halo investigasaun klean kona-ba konflítu ne’ebé akontese iha tinan 1999 antes no depois konsulta popular, komisaun ida ne’e konsege produs relatóriu komisaun nian ho titulu relatóriu mak Per Memóriam Ad Spem (PMAS) ho tetun “Husi Memoria Ba Esperansa”.
Nune’e hafoin estabelesimentu Centro Nacional Chega!I.P iha Jullu 2017, Centro Chega! hahú halo enkontru regulár no servisu ho parseiru estratejiku sira ba implementasaun rekomendasaun Chega! no PMAS. Parseiru estratejiku hirak ne’e envolve iha Grupu Servisu (Working Group) ne’ebé la hanesan tuir área temátiku ida-idak. Grupu servisu sira ne’e envolve liña ministeriál sira, instituisaun independente, akadémiku no sosiedade sivíl, hatudu progresu balun liu-liu oinsá adopta Rekomendasaun Chega! no PMAS iha sira nia planu no no programa inklui orsamenta, mezmu iha parseiru balun seidauk implementa, maibé Centro Nacional Chega!I.P kontinua fo hanoin ba sira atu implementa.
(Media-CNC)