(Dili, 22 Marsu 2024) – Centro Nacional Chega!I.P asina Nota Entendementu/Memorandum of Understanding (MoU) ho organizasaun inter-governamentál g7+ iha área advokasia ba asuntu paz no rekonsiliasaun iha nivel nasional no internasional, ne’ebé realiza iha Sekretariadu g7+ iha Dili, Timor-Leste.
Objetivu prinsipal husi asina nota entendementu ne’e mak atu estabelese kolaborasaun hodi tulun iha implementasaun Rekomendasaun sira husi relatóriu final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, no fasilita fahe esperiénsia kona-ba buka lia-loos, rekonsiliasaun, harii dame no harii estadu entre nasaun membru g7+ sira kompostu nasaun 20 hanesan Afghanistan, Burundi, Republika Sentral Afrikana, Chad, Comoros, Cote d’Ivoire, Republika Demokratika Congo, Gunie-Bissau, Haiti, Liberia, Guinea, Papua New Guinea, Sao Tome e Principe, Sierra Leone , Solomon Islands, Somalia, Sudan do Sul, Timor-Leste, Togo no Yemen no seluk tan.
Nota Entendementu ne’e mos foku ba kooperasaun hanesan, apoiu implementasaun rekomendasaun sira husi relatóriu Chega! no PMAS no ajuda fahe esperiénsia! liu husi konferénsia internasionál, média no rede sira seluk no liu husi organizasaun internasional Nasoes Unidas no mós ba nasaun no instituisaun sira ne’ebé temi iha relatóriu Chega! no PMAS. Nota Entendementu ne’e mos sei fasilita atu fahe esperiénsia no lisaun entre Timor-Leste no nasaun membru g7+ sira inklui nasaun la’os g7+ sira seluk iha asuntu harii dame no harii estadu.
Nota Entendementu nia validade ba tinan 4 (haat), komesa husi loron asina Nota Entendimentu no bele prolonga ninia durasaun ka bele renova ninia konteúdu tuir nesesidade servisu nian. g7+ nu’udar organizasaun inter-governamental voluntáriu ida husi nasaun 20 ne’ebé advoka ba polítika kooperasaun dezenvolvimentu ne’ebé efetivu tuir sira-nia kontestu nasionál no enkuadra iha ámbitu dezenvolvimentu harii dame no estadu nian ba kolaborasaun ho ninia membru sira no parseiru dezenvolvimentu sira.
(Media-CNC)