Dili, (26 Juñu 2024) – Centro Nacional Chega! Instituto Publiku (CNC I.P) hamutuk ho CHL (Community Housing Limited) nu’udar parseiru implementadór entrega Uma “Da Memória À Esperança” ba Sobrevivente Antonia Carvalho Soares iha Suku Becora, Postu Administrativu Kristu Rei, Munisipiu Dili. Serimonia ne’e realiza iha Aldeia Au-hun, loron Kuarta-feira (26 Juñu 2024). Objetivu prinsipal husi serimonia entrega uma ba Sobrevivente Antonia Carvalho Soares atu dignifika no valoriza sira nia kontribuisaun luta ba ukun rasik-an.
Istória badak Sobrevivente Antonia Carvalho Soares
Antonia Carvalho Soares nu’udar Sobrevivente ida husi konflitu pasadu, moris iha loron 01 Janeiru 1962. Agora dadaun hela iha Aldeia Au-Hun, Suku Becora, Postu Administrativu Cristu-Rei, Munisipiu Dili, iha oan nain 8 feto 4 no mane 4.
Iha tinan 1975 Sobrevivente Antonia Carvalho Soares ho familia halai ba foho Matebian hodi subar tanba funu. Husi tinan 1975-1979 militar Indonézia halo atake ba foho Matebian rezulta komunidade barak mate, nune’e iha tinan 1980 tun husi foho Matebian mai iha Vila, depois militar Indonézia halo kapturasaun ba sira hodi halo detensaun durante loron haat iha sela no hetan violasaun direitus umanus oin-oin.
Hafoin konsulta popular 30 Agustu 1999. Iha loron 4 Setembru 1999 milisia Pro-integrasaun hamutuk ho militar Indonézia oho nia laen ho nia kolega sira iha nia oin. Milisia Pro-integrasaun la’os oho de’it nia laen, maibé sira mos sunu sira nia uma.
Ho problema hirak ne’e, Centro Nacional Chega!I.P hamutuk ho Asosiasaun Vitima Konflitu Politiku 1974-1999 halo asesmentu ida ba sobrevivente Antonia Carvalho Soares nia kondisaun. Iha asesmentu ne’e rezultadu hatudu katak, sobrevivente Antonia nu’udar feto faluk agora enfrenta problema kondisaun uma ne’ebé ladi’ak. Alende kondisaun uma sobrevivente ne’e mos enfrenta problema kondisaun saúde mental tanba trauma ka hanoin barak tanba nia laen hetan oho.
Nune’e, Centro Nacional Chega!I.P servisu hamutuk ho CHL (Community Housing Limited) hanesan parseiru implementadór halo uma “Da Memória À Esperança” ba Antonia Carvalho Soares iha suku Becora. Uma ho medida 63m2, kompostu husi kuartu 3, sala vizita 1, haris fatin 1 no dapur iha parte liur ho medida 7,5m2. Uma ida ne’e harii ho montante osan kuaze USD 24,091.86.
Uma “Da Memória À Esperança” nudar parte ida husi implementasaun Mandatu Centro Chega! nian tuir Dekretu Lei 48/2016 mak atu tau-matan no apoiu Sobrevivente sira husi Violasaun Direitu Umanu ne’ebé akontese iha periodu1974-1999. Nune’e mos nudar programa prioridade Governu nian ne’ebé hatur iha CNC nia responsabilidade atu fo tulun ba prezervasaun memória pasadu sira no kontinua promove direitu umanu no rekonsiliasaun.
Media Chega!