(Manufahi, 19 Janeiru 2024) – Centro Nacional Chega!I.P, Asosiasaun Vitima Konflitu Politiku 1974-1999 (AVKP) hamutuk ho Autoridade Munisipiu Manufahi entrega Uma Memoria ba Espransa (UMbE) ba Sobrevivente Ilda de Oliveira liu husi nia oan mane Domingos da Silva Oliveira tanba nia mate iha tinan kotuk, iha Suku Rotutu, Postu Administrativu Same. Munisipiu Manufahi.
Objetivivu prinsipal entrega Uma Memoria ba Espransa (UMbE) ba Sobrevivente Ilda de Oliveira, atu valoriza no dignifika nia kontribuisaun luta ba ukun rasik-an. No mos nu’udar asaun implementasaun rekomendasaun Chega! kona-ba “Reparasaun ba Vitima”.
Ilda de Oliveira hanesan sobrevivente ida tanba iha tinan 1982 militar Indonézia TNI (Tentara Nasional Indonesia) muda obrigatoriu ba Betano durante tinan 7 tanba funu. Durante tinan 7 iha Betano Sobrevivente hetan violasaun oin-oin husi Militar Indonézia. Alende halo torturasaun, Sobrevivente Ilda mos lakon (mate) nia oan mane ida ne’ebé sira hadomi iha Betano tanba kauza husi hamlaha. Nune’e, iha tinan 1989 sobrevivente Ilda ho familia obrigadu fila ba moris fatin Rotutu no hela ho familia sira to’o Timor ukun-an.
Durante ne’e, Sobrevivente Ilda hela iha Rotutu, hela ho familia iha uma lisan Manetelu Rotutu nian ho kondisaun uma ne’ebé ladignu. Iha tinan 2018 sobrevivente Ilda mos afeita moras mental tanba kauza husi funu, durante ne’e nia halo ona tratamentu saúde iha Sentru Saúde Mental Laklubar. Ho kondisaun ne’e, vitima rasik hela iha uma la ho kondisaun di’ak. Centro Nacional Chega!I.P identifika sobrevivente ne’e merese hetan Uma Memoria ba Esperansa (UmbE) tanba hela iha kondisaun uma ne’ebé ladignu.
Nune’e, uma ne’ebé Centro Nacional Chega!I.P, Asosiasaun Vitima entrega Uma Memoria ba Esperansa (UMbE) hamutuk ho Autoridade Munisipiu Manufahi entrega ba Sovrevivente Ilda de Oliveira liu husi nia oan mane, Domingos da Silva Oliveira, uma ho medida 9×7, kompostu husi, Kuartu 3, sala 1, haris fatin 1, varanda 1 no mos dapur, kompleta ho instalasaun eletrisidade, plafon no keramik, exeptu dapur ho totál kustu $ 14.800 inklui ona selu badae.
Tuir dadus Centro Nacional Chega!I.P liu husi Divizaun Solidariedade ba Sobrevivente (DSS) rejistu katak, husi 2021 to’o 2023, Centro Nacional Chega!I.P entrega ona Uma Memoria ba Esperansa (UmbE) ba sobrevivente mais vulneravel hamutuk 18 kompostu feto 7 no mane 11.
Media-CNC