Covalima – (11 Outobru 2025), Komisaun Organizadora ba eventu Festivál Fronteira 2025 kompostu hosi Centro Nacional Chega!I.P, Sekretáriu Estadu Arte no Kultura (SEAK), Ministériu Juventude Arte no Kultura (MJDAK), Ministeriu Administrasaun Estatal (MAE) no Prezidente Autoridade Munisipiu Covalima hato’o parabens ba komunidade Munisipiu Covalima tanba durante eventu Festivál Fronteira komunidade sira garante paz no estabilidade.
Eventu Festivál Fronteira 2025 iha Munisipiu Covalima kompleta ho atividade desportu mak hanesan, jogu futebool, volibool, atletizmu no halai taru kuda. Atividade Feira Produtu, Atividade vizita sítiu istóriku, atividade dialogu no seminariu, atividade performa arte no kultuta ne’ebé demonstra diversidade kultural no produsaun konjunta konteudu istória no kultura liu hosi arte hanesan, konsertu muzika, sound experimental mistura ho teatru no projection, dansa kultura, koreografi ka dansa kontemporanio ne’ebé mistura hosi nasaun rua Timor-Leste no NTT (Nusa Tenggara Timur). Atividade hirak ne’e la’o ho di’ak.
Iha diskursu enseramentu, eventu Festivál Fronteira 2025, Diretór Ezekutivu Centro Nacional Chega!I.P, Hugo Maria Fernandes hateten, tempu mak halo ita atu hasoru malu, tempu mak halo ita fahe malu, ita hasoru malu, ita kontente, ita fahe malu, ita fo de’it liafuan adeus, maibé fila karik hanoin hela sira ne’ebé mak ita hasoru malu.
Diretór esplika, Centro Chega! sente ondradu, no sente orgullu tebes atu bele iha oportunidade, lori atividade Festivál Fronteira tinan ida ne’e mai iha Munisipiu Covalima. Diretór mos halo komparasaun ba atividade Festivál Fronteira hanesan ita sae foho ramelau karik, ita ba iha Hatobuiliku ne’e ita halo iha Maliana, ita ba to’o iha klaran ita halo iha Oekuse, maibé ita halo iha Covalima ita sa’e foho Ramelau karik ita la’o to’o iha Ramelau nia tutun.
“Ne’e hatudu katak vontade no solidariedade komunidade Covalima nian mak bele halo atividade loron 3 ne’e bele la’o ho susesu, parabens ba komunidade Covalima”, Diretór parabeniza.
Centro Nacional Chega!I.P liu hosi oportunidade ida ne’e hakarak hato’o profunda gratisaun ba MAE, MJDK, liu-liu SEAK ba nia prontidaun ba nia firmeza katak, kanek no fita sira iha tempu uluk nian ita bele kura liu hosi arte no kultura.
Kalan tolu iha ne’e, ohin kalan ikus liu ita bele haree katak arte no kultura bele halibur ita, bele ita dansa iha tanis nia laran, maibé mos bele ita dansa iha hamnasa nia laran. Lala’ok ida ne’e mak hau hanoin importante. I hau hanoin joven sira munisipiu Covalima hatudu duni sira nia hamnasa, sira nia oin ne’ebé mak midar ho ibun ne’ebé mak midar wainhira simu ita nia bainaka sira.
Foin dadauk akontese iha ita nia fronteira ita nia bainaka sira mai tauk karik, maibé komunidade Covalima hatudu sira nia maduru, sira nia espiritu ida fuan boot, laran luak simu nafatin ita nia bainaka sira. Orgullu ida ne’e mak hau hanoin importante atu jerasaun foun sira banati tuir nafatin ita nia inan no aman sira, ita nia nai veteranu no veterana sira no vitima sira.
“Kanek bele iha, fitar bele iha maibe ida ne’e memoria ida ne’ebé mak murak liu ita husik hela ba rai ida ne’e. Hau atu taka, hakarak dala ida tan, ami nia profunda gratidaun uluk no uluk liu ba komunidade Covalima ita fo basa liman ida ba komunidade Covalima”, Diretór agradese.
Ida ne’e atu hatudu de’it katak estadu governu iha komprimisu atu halo timor ne’e sai duni rai ida ne’ebé mak murak, rai ida ne’ebé mak domin, buras no buras ba nafatin iha Timor-Leste. Obrigado wain.
Media Chega!.