Istoria Pasadu husi Relatóriu Chega! – Relembra fali mai ita hotu katak, iha loron 10 Juñu 1980, Forsa Falintil husi Seitór Fronteira Norte no Centru Súl, hamutuk ho Membru Rede Klandestina sira iha Dili halo atentadu ba Sede Forsa Indonézia nian iha Transmisaun Foun TVRI iha Marabia nomós atentadu ba Paiol Quartel Kompi B Bataliaun 744 iha Becora hodi hadau armas forsa batallaun 744 no tiru mate militár Indonéziu lubuk ida.
Atentadu ne’e ho objetivu hodi hatudu ba komunidade internasionál katak luta povu Timor ba auto-determinasaun sei eziste no konsidera nu’udar levantamentu dahuluk hafoin Fretilin konsideradu derota husi Militár Indonézia iha fim tinan 1978.. (Atentadu ne’e Falintil sira hanaran ho Levantamentu Marabia).
Depois atentadu ne’e, Forsa Indonézia halo operasaun boot ida hodi kaptura no oho komunidade ne’ebé sira deskonfia no mós membru rede klandestina sira, inklui Forsa Falintil sira ne’ebé envolve direta iha levantamentu ne’e. Tuir informasaun ne’ebé sasin sira fó, iha operasaun ne’e forsa Indonézia oho ema kuaze na’in 121, no lori hotu família husi ema sira ne’ebé envolve iha levantamentu ne’e hodi ba kastigu iha Ilha Ataúro.