Funsionáriu Na’in 41 Partisipa Formasaun Kona-ba Archives Service and Publication Iha Centro Chega!I.P Ho Susesu
Raimundo Sarmento Fraga
Dili – (25 Setembru 2026), Centro Nacional Chega!I.P servisu hamutuk ho Arsip Nasional Republik Indonesia (ANRI) no United Nations Educational, Scientific and Cultural Organization (UNESCO) fo formasaun ba funsionáriu na’in 41 ne’ebé mai husi instituisaun sira hanesan, Arkivu Nasional Timor Leste (ANTL), Arkivu no Muzeu Reziténsia Timorense (AMRT), Centro Chega!I.P, Sekretáriu Estadu Arte no Kultura (SEAK), Centro Audiovisual Max Stahl Timor-Leste (CAMSTL) no Xanana Gusmão Reading Room.
Formasaun durante loron 5 hahu (21-25) ne’ebé hala’o iha edifisiu Centro Chega!I.P kona-ba ‘Sharing Knowledge and Capacity Building Program on Archives and Documentary Heritage: Training on Archives Service and Publication’ ho susesu.
Diretór Ezekutivu Centro Nacional Chega!I.P, Hugo Maria Fernandes iha diskursu enseramentu formasaun, hato’o parabens ba partisipante sira ne’ebé partisipa formasaun durante loron 5 iha Centro Chega!I.P ho susesu. Nia haktuir formasaun ne’e importante tebes atu bele hasa’e koñesimentu funsionariu sira nian kona-ba arkivu tanba arkivu la’os de’it halo prezervasaun ba surat-tahan ka korespondénsia sira, maibé haree arkivu hanesan parte ida husi moris.
“Lori Centro Chega! nia naran hakarak agradese ba governu Indonézia nia apoiu ba programa ida ne’e. Ha’u espera katak partisipante sira hotu hetan benefísiu. Ita-boot sira hotu sei simu sertifikadu sira nu’udar rekoñesimentu ba koñesimentu no abilidade sira ne’ebé ita-boot sira hetan ona”, Diretór agradese.
Iha fatin hanesan, Koordenadora Projetu Antena UNESCO Dili-Timor-Leste, Kim Hye Yong hato’o parabens ba fasilitadór no formandu sira ne’ebé konsege termina formasaun ho susesu. Nia afirma, formasaun kona-ba arkivu ne’e importante tebes tanba arkivu la’ós de’it halo rejistu, maibé arkivu hanesan memória povu nian.
Arkivu hanesan fundasaun ida ba dame tanba ne’e tenke prezerva arkivu ho di’ak no asesivel ho nakloke atu permite jerasaun foun sira atu aprende istória ho baze iha evidénsia, no sei ajuda harii komprensaun mútua ida ne’ebé mak dame no dura. Sosiedade ida ne’ebé aprende istória mak sosiedade ida ne’ebé rekoñese pasadu, defende direitus umanus, defende lialos, no apoiu diálogu no rekonsiliasaun.
“Ha’u fiar katak programa ne’e iha valór ba partisipante sira hametin sira nia abilidade no koñesimentu prátika, iha prezervasaun no protesaun ba memória. Ami apresia tebes ANRI nia esforsu”, nia dehan.
Adjunta Sistema Arkivu Nasional no Informasaun ANRI, Wiwi Diana Sari esplika, formasaun ne’e importante tebes ba timoroan sira atu bele hasa’e koñesimentu iha área prezervasaun nian. Nia argumenta katak, prezervasaun arkivu ne’e buat ida ne’ebé esensiál tebes tanba ko’alia kona-ba arkivu, jestaun, arranju, avaliasaun risku, no jestaun dezastre, restaurasaun, no dijitalizasaun ne’e imporante.
Entertantu, formasaun ne’e fasilita husi ekipa ANRI ho materia sira ne’ebé aprende iha formasaun mak hanesan, archives service and publication, Archival source publication, Archival exhibition no ikus ho atividade pameran husi formandu sira.
