Funsionáriu Centro Chega!I.P Hetan Formasaun Kona-ba Auditoriu Interna

Dili – (29 Juñu 2026), Centro Nacional Chega!I.P liuhusi Divizaun Politika, Planeamentu no Rekursu Umanu (DiPPRU) fo formasaun ba funsionariu Centro Chega!I.P hamutuk na’in 27, mai husi divizaun operasional no programatiku sira. Formasaun ne’e hala’o durante loron 5 hahu (22, 23, 24, 25, 29), ne’ebé fasilita husi Martin Jr. Banaken Papay atúal Asesór iha Inspesaun Jerál Estadu (IJE).

Materia sira ne’ebé aprende durante formasaun hanesan, Introdusaun ba auditoria interna, padraun no étika profisionál sira, Governasaun, Jestaun risku, no kontrolu internu, Planeamentu auditoria nian, Hala’o servisu iha kampu auditoria nian, Rezultadu no relatóriu auditoria nian, Monitorizasaun no akompañamentu, Konxiénsia no prevensaun ba fraude, Ezersísiu prátiku sira no estudu kazu sira.

Objetivu prinsipal husi formasaun ne’e, atu komprende natureza, objetivu, no importánsia husi auditoria interna. Identífika papél no responsabilidade husi auditór internu sira. Esplika konseitu governasaun, jestaun risku, no kontrolu internu. Aplika prosedimentu no tékniku auditoria interna báziku. Prepara dokumentu servisu auditoria nian no relatóriu auditoria nian. Rekoñese padraun étika no konduta profisionál iha auditoria interna. Halo planeamentu auditoria báziku, servisu iha kampu, no atividade relatóriu sira. Objetivu seluk, atu hametin partisipasaun sira nia koñesimentu, abilidade, no komprensaun kona-ba prinsípiu, padraun, no prátika sira auditoria internu nian hodi promove transparénsia, komprimentu, efisiénsia operasionál, no governasaun di’ak.

Iha abertura, Diretór Ezekutivu Centro Nacional Chega!I.P, Hugo Maria Fernandes destaka formasaun auditoriu interna ba funsionáriu Centro Chega! nu’udar maneira ida aprende atu hasa’e koñesimentu iha setór auditoriu interna nian.

Diretór afirma katak, formasaun ne’e importante tebes ba kargu xefia sira atu hatene kon-ba lala’ok auditoria interna nian, para depois wainhira funsionariu sira, karik hato’o relatóriu ruma liga ba atividade nian, sira bele hatene, rekejitu saida mak presiza prense antes haruka ba Divizaun Finansas no Operasionais (DFO), no mos ba Unidade Juridiku Auditoria Interna-Chega! nian.

Nune’e, ho formasaun ne’e, Diretór garante katak, bele ajuda Unidade Juridika Auditoria Interna-Chega! halo preparasaun ba sira nia planu anual di’ak liu tan hodi fokus ba materia sira ne’ebé sira aprende durante iha formasaun.

Diretór mos agradese ba Inspesaun Jerál Estadu (IJE) ne’ebé delega ona Martin Jr. Banaken Papay hodi fasilita no fo ona formasaun ba fusionáriu Chega! durante loron 5.

Iha oportunidade hanesan, Diretora Divizaun Politika, Planeamentu no Rekursu Umanu (DiPPRU), Maria Arminda Guterres reforsa,  razaun Chega! liuhusi DiPPRU fo formasaun ba funsionáriu sira iha área auditoria nian atu iha koñesimentu hodi prevene risku sira ne’ebé sei mosu iha futuru.

“DiPRU hanesan divizaun ida ne’ebé responsabilidade oinsa mak hasa’e koñesimentu no kapasidade funsionáriu sira nian. Depois de avaliasaun ho rekomendasaun ida halo koodenasaun ho parte relevante sira hodi fasilita formasaun ba funsionáriu ba iha Unidade Juridiku Auditoriu Interna atu bele asegura servisu liga ho dekretu lei Nu. 48/2016”, Diretora salenta.

Diretora mos iha espera, ho formasaun Auditoriu Interna durante loron 5, funsionáriu sira bele iha koñesimentu oituan kona-ba servisu Audioria Interna, maske ita laiha backgrounds Auditoria Interna, maibé ita prepara ita nia-an para oinsa ita sai auditór ba servisu ne’ebé ita halo.

Media Chega!.