Eskola Katolika Santa Ursula Baucau Vizita Muzeu Chega! no Vizita Sitiu Istoriku Sira iha Dili

Dili – (23 Abril 2025), Estudante Terseiru (3⁰) Siklu, Nuno (9⁰) ano husi Eskola Katolika Santa Ursula Vila-Nova Baucau hamutuk 63, akompaña husi manorin sira vizita Muzeu Chega! inklui sitiu istóriku sira iha Munisipiu Dili. Objetivu husi vizita ne’e mak lori estudante sira atu aprende istória pasadu povu Timor-Leste nian ba ukun rasik-an.

Xefe Ekipa nu’udar mos Manorin Materia Siénsia Sosiais, Juvito Ruas Ximenes hateten, lori estudante sira husi eskola Katolika Santa Ursula Vila-Nova Baucau hamutuk 63, akompaña husi manorin sira hamutuk 20 ho total 83 ne’ebé hala’o vizita ba iha fatin istóriku sira munisipiu Dili inklui Muzeu Chega! atu aprende istória pasadu.

Nia haktuir, vizita ne’e parte ida husi atividade anual eskola nian, hodi lori estudante sira atu aprende istória tanba istória la’os de’it ita aprende iha aula laran ka eskola, maibé lori estudante sira vizita ba iha fatin istoriku sira atu aprende hodi hasa’e sira nia koñesimentu.

“Ami mai vizita fatin istoriku, ami mai ho objetivu mak fo koñesimentu kona-ba fatin istoriku ne’ebé mak iha kapital Dili hanesan Ponte Kais, Santa Kruz mai iha Chega!”, dehan Xefe Ekipa, hafoin remata vizita iha Muzeu Chega!.

Nia afirma, vizita ida ne’e mos atu hasa’e estudante sira nia kapasidade parte istória nian tanba mundu ida agora ne’e la’os aprende de’it siénsia, maibé mos tenke iha koñesimentu kona-ba istoria nasaun ninian, ne’ebé mak ita nia nasaun hasoru iha tempu pasadu. Ohin loron ita sai nasaun ida livre, independente no soberanu, ne’e la’os prezente (hadia) ida ne’ebé mak tau iha bandeiza fo ba ita, maibé liu husi luta naruk ida ne’ebé ema barak sakrifika-an ba terus no mate. Balun hetan torturasaun no violasaun oin-oin husi militar Indonézia.

Xefe Ekipa ne’e subliña katak, istória importante ba estudante atu aprende tanba ne’e kada tinan skola Katolika Santa Ursula sempre organiza atividade vizita ne’e ho kooperasaun Centro Chega!I.P.

“Ami nia vizitasaun ida ne’e mos la’os ba tinan ida ne’e de’it, ami husi fundasaun Kolejiu Santa Ursula servisu hamutuk ho Chega!. Kadevez Chega! konvite ami tuir sertame, ami partisipa nafatin ami kolabora ho Chega!, ami lori estudante sira hodi tuir kompetisaun ne’ebé mak loke husi Chega!”, Juvito salenta.

Entertantu, vizita ne’e hala’o ho kooperasaun entre Eskola Katolika Santa Ursula Vila-Nova Baucau ho Centro Nacional Chega!I.P no vizita ne’e hodi refleta kooperasaun ne’ebé di’ak no forte iha futuru.

Media Chega!.