Dili – (04 Jullu 2024), Centro Nacional Chega! Instituto Publiku (CNC I.P) iha papél importante atu transmite istória ba jerasaun foun sira hodi haburas kultura dame no prevene repetisaun hahalok violensia iha sosiedade.
Kestaun ne’e hato’o husi Prezidente Konsellu Administrasaun Centro Nacional Chega! Instituto Publiku (CNC I.P), Manuel Mesquita Pereira iha diskursu seminariu ho tema “Papél Museu no Arkivu iha Prezervasaun Memória no Introdusaun Istória”.
Oradór ba seminariu mak Konsellu Asesoria Internasional Centro Chega! hanesan, Prof. David Webster ko’alia kona-ba “Papél Museum no Arkivu ba Prezervasaun no Transmisaun Istória no Memória Koletiva”. Dr. Nisay Hang ko’alia “Papél Museu no Arkivu ne’ebé dealing ho Memória difisil no Prevensaun Violensia Massal” no oradora profa. Dra. Khoon Ying Hooi ko’alia “Papél Museu no Arkivu ba Edukasaun ba Paz no Promosaun Direitus Umanus”.
Seminariu ne’e abertura husi Vise Ministru Asuntu Parlamentar (VMAP), Aderito Hugo da Costa, partisipa husi Sekretáriu Estadu Arte no Kultura (SEAK), Jorge Soares Cristovão, Adjuntu Provedór ba Provedoria Diretór Umanus no Justisa (PDHJ), Rigoberto Monteiro, Sosiedade Sivil, Akademiku no parseiru sira.
Iha seminariu ne’e, Prezidente Konsellu Administrasaun Centro Nacional Chega! Instituto Publiku (CNC I.P), Manuel Mesquita Pereira hateten, Centro Chega! nu’udar instituisaun publiku iha papél importante atu transmite istória ne’ebé útil ba jerasaun foun sira atu aprende hodi larepete hahalok violensia hodi haburas kultura dame, paz no promosaun Direitus Umanus (DU) iha Timor-Leste.
“CNC nia misaun la’os halo de’it dokumentasaun maibé sei fokus mos ba transmisaun istória sira ne’ebé util ba jerasaun foun hodi haburas kultura dame no prevene repetisaun hahalok violensia sira,” dehan Prezidente Konsellu Administrasaun Centro Chega! iha diskursu seminariu, ne’ebé realiza iha Salaun Konferensia Centro Chega!, Antigo Comarca Balide-Dili, Kinta-feira (04 Jullu 2024).
Prezidente informa, objetivu prinsipal husi seminariu ne’e mak, atu aprofunda ita nia koñesimentu kona-ba papél Museu no Arkivu sira hodi prezerva no transmite istória no memória koletiva. Atu aumenta ita nia kompriensaun kona-ba Museu no Arkivu bele hasoru memória difisil sira hodi prevene violensia. No mos atu aumenta ita nia koñesimentu kona-ba papél instituisaun sira ne’e iha edukasaun ba dame no promosaun direitus umanus.
Seminariu ne’e, nu’udar ondra no previlejiu boot ida ba Centro Nacional Chega!I.P atu simu konvidadus no partisipante sira iha seminariu ida ne’e. Ohin ita halibur iha misaun ida atu explora no haklaken iha koñesimentu kona-ba oinsa Museu no Arkivu sira sai instrumentu importante hodi prezerva istória i povu nia memória koletivu no mos oinsa instituisaun sira ne’e bele halo papél importante ida hodi harii futuru ida bazeia ba dame no direitus umanus.
Nia afirma, atu kumpri misaun nobre ida ne’e CNC I.P kontinua hadia nia estrutura sira inklui modernizasaun Museu Komarka Balide ne’ebé sei remata iha fulan Outobru tinan ne’e. no estabelesimentu Centro Arkivu foun ida ho aproximasaun modernu ne’ebé sei hahu nia operasaun iha tinan oin.
Seminariu ohin loron ne’e nu’udar inisiativa importante ida. Importante husi CNC I.P mak atu kria plataforma ida hodi fahe esperensia no halibur hanoin sira ne’ebé sei orienta CNC iha jestaun Museu no Arkivu sira ho efetivu. CNC I.P sente ondradu ho prezensa husi distintu orador nain 3 ne’eb’e sei fahe sira nia koñesimentu no esperensia barak iha area jestaun Museu, iha Arkivu no istória, prevensaun violensia no mos direitus umanus nian.
“Ami agradese ba partisipasaun instituisaun estadu sira akadémiku, peskizadores, jestór Museu sira, estudante no ativista sosiál sira. Ita boot sira nia perspetiva no esperensia oin-oin sei kontribui ba dialógu ne’ebé riku no signifikativu,” nia agradese.
(Media CNC)