CNC I.P Selebra Aniversariu Ba Dala-9 Ho Tema “Hosi Memória ba Esperansa”
Raimundo Sarmento Fraga
Dili – (17 Jullu 2026), Centro Nacional Chega!I.P selebra aniversáriu ba dala-9 ho tema “Hosi Memória ba Esperansa”, ne’ebé hala’o iha Antigo Comarca Balide.
Serimonia ne’e hetan partisipasaun hosi Reprezentante Primeiru Ministru (PM) atúal Segundu Vise Primeiru Ministru (PM), Sua Exelensia Eng. Mariano Asanami Sabino Lopes, Prezidente Tribunal Rekursu (PTR), Afonso Carmona, Sekretariu Estadu Arte no Kultura (SEK) Jorge Soares Cristovão, Provedór Provedoria Direitus Umanus no Justisa (PDHJ), Vigilho da Silva Guterres “Lamukan”, Prezidente Konsellu Administrasaun Chega! ho membru sira, Prezidente Autoridade Munisipiu Manufahi no Covalima no parseiru sira no mos entidade sira hosi nasional no internasional.
Iha diskursu, Vise Primeiru Ministru, Ministru Koordenadór Asuntu Sosiál, no Ministru Dezenvolvimentu Rurál no Habitasaun Komunitária (MDRHC), Eng. Mariano Assanami Sabino hato’o mensajen governu no Sua Exelensia, Primeiru Ministru (PM), Kay Rala Xanana Gusmão nian kona-ba selebrasaun aniversariu Centro Nacional Chega!I.P ba dala-9 mak servisu hamutuk no kontinua la’o ba oin.
Selebrasaun ne’e kompleta ho atividade sira hanesan, misa agradesimentu, exibisaun dokumental Chega! tinan-9, lansamentu relatóriu annuál 2025, lansamentu relatóriu peskiza avaliasaun impaktu prosesu rekonsiliasaun komunitária 2002-2004, lansamentu video apoiu Uma Memoria ba Esperansa (UMbE) ba sobrevivente sira, ikus liu serimonia ku’a ke’ek no loke sampaña.
“Lori governu, no Primeiru Ministru nia liafuan mak ne’e, mantein nafatin esforsu servisu hamutuk membru sira, Diretór Ezekutivu atu kontinua nafatin la’o ba oin, tanba buat ida ne’e kompleksu, ne’e la’os fatin ida ne’ebé troka malu nian, fatin ida ne’ebé tenke hatene hodi nafatin eleva, nafatin buat ne’e ba oin”, dehan Vise PM.
Iha aniversariu ne’e, Diretór Ezekutivu Chega!, Hugo Maria Fernandes hateten, selebra aniversariu Chega! ba dala-9 ita promete katak vítima ida mós sei la la’o mesak hodi tula todan istória nian iha ninia kabas, tanba bainhira ita harii Centro Chega!, ita halo juramentu solene ida ba nasaun ne’e, juramentu kona-ba “Hosi Memória ba Esperansa”.
“Selebra aniversariu Chega! ba dala-9 nu’udar tempu ida foin hahu no sei metin nafatin. Ami sei rona, ami sei rai, no ami sei fahe imi nia memoria sira nune’e ami no ema barak labele haluha imi nia terus, imi nia halerik sira no imi nia esperansa sira”, akresenta Diretór.
