Centro Chega!I.P Parseria UNESCO ho KOICA Organiza Treinamentu Kona-ba “Library and Data Record Management”

Dili, (17 Abril 2026) – Centro Nacional Chega!I.P parseria United Nations Educational, Scientific, and Cultural Organization (UNESCO) ho Korea International Cooperation Agency (KOICA) organiza treinamentu kona-ba “Library and Data Record Management”, ne’ebé hala’o iha Salaun Konferensia Centro Chega!I.P, Antigo Comarca Balide.

Treinamentu ne’e partisipa husi Biblioteka Xanana Gusmão Reading Room, Instituto São João de Brito (ISJB), Arkivu Nasional Timor-Leste (ANTL), Arkivu Muzeu Rezistensia Timorense (AMRT) no Movimentu Letras. Treinamentu ne’e fasilita husi Zulbahri (National Library of Indonesia) no Hendro Wicaksono (Indonesian Ministry of Primary and Secondary Education).

Diretór Ezekutivu Centro Chega!I.P, Hugo Maria Fernandes, iha diskursu abertura fo enfaze kona-ba importansia husi treinamentu no subliña objetivu atu hasa’e koñesimentu partisipante sira kona-ba sistema jestaun arkivu no biblioteka nian.

Diretór salenta katak, treinamentu ne’e nu’udar oportunidade ida importante tebes atu bele fahe esperensia ba malu entre instituisaun ida husi instituisaun seluk, no mos hetan esperensia foun husi fasilitadór sira atu nune’e bele mellora servisu iha idak-idak nia instituisaun.

Treinamentu ne’e nu’udar programa kooperasaun entre CNC I.P ho UNESCO ho apoiu osan husi KOICA. Programa ne’e hanaran Digitization of CHEGA National Centre for Conflict Reconciliation and Peacebuilding in Timor-Leste. Komponente importante husi programa ne’e, primeiru dezenvolve sistema no prosedur arkivu. Segundu sistema biblioteka Centro Chega!, terseiru mak dezenvolve kurikulum aprendisajen no treinamentu ba manorin sira espesifiku ba istória no direitus umanus.

Agora daudaun Centro Chega!I.P prezerva arkivu mais 50,000 materiál arkivu nian inklui papél sira, dokumentu eletróniku sira, fotografia istóriku sira, no mapa sira mak rai iha Centro Chega! iha sala arkivu nian. Materiál sira mak sasin vítima sira nian hosi polítiku violénsia durante tinan 1974-1999, rejistu prosesu rekonsiliasaun komunitária, dokumentu julgamentu tribunál nian ba dadur polítiku sira, entrevista ho líder polítiku sira, no dokumentu internasionál sira ne’ebé konfidensiál.

Tanba ne’e, prezervasaun profisionál ba fonte memória sira ne’ebé iha valór liu hosi kapasitasaun institusionál ba jestaun sustentável ba sistema arkivu no biblioteka sira mak urjente atu hametin responsabilidade nasionál no kapasidade atu harii nasaun nia futuru ne’ebé di’ak liu iha pás, justisa, no prosperidade ba nasaun no hodi kontribuisaun ba harii pás no rekonsiliasaun iha rejiaun.

Media Chega!.