Dili – (08 Dezembru 2023), Vise Ministru Asuntu Parlamentar (VMAP), Aderito Hugo da Costa hateten, durante fulan 5 asumi kargu nu’udar Vise Ministru Asuntu Parlamentar, iha Nonu Governu Konstitusionál observa katak, servisu Centro Nacional Chega!I.P hanesan instituisaun espesializada ba prezervasaun memória Timor-Leste nian.
Kestaun ne’e Vise Ministru Asuntu Parlamentar (VMAP), Aderito Hugo da Costa hato’o iha diskursu lansamentu livru ho titúlu “Muzika Populár no Rezisténsia iha Períodu Okupasaun 1980-1999”, iha Jardin 5 de Maiu, iha ámbitu Festivál Kultura Rezisténsia Populár (FKRP) ba dala-5.
Vise Ministru hatutan, Centro Chega!I.P nu’udar instituisaun ida importante iha Timor-Leste tanba haree ba pontu importante rua; Primeiru, Centro Nacional Chega!I.P hanesan instituisaun espesializada ba prezervasaun memória Timor-Leste. Segundu, Centro Nacional Chega!I.P hanesan instituisaun ida halo promosaun ba solidariedade ho sobrevivente mais vulneravel iha pasadu.
“Ho ha’u nia observasaun durante fulan 5 hanesan membru Governu, ha’u bele dehan, hanesan entidade ida espesializadas relevante ba Prezervasaun Memória de Timor-Leste no mos Promosaun kontinua ba Solidariedade ho Sobreviventes mais Vulneravel do Pasadu”, dehan Vise Ministru iha diskursu iha serimonia lansamentu livru ho titúlu “Muzika Populár no Rezisténsia iha Períodu Okupasaun 1980-1999”, iha Jardin 5 de Maiu, iha ámbitu Festivál Kultura Rezisténsia Populár ba dala-5.
Nia argumenta, Timor-Leste, maske mosu instituisaun oin-oin, maibé Centro Chega!I.P nia atividade sempre diferente ho instituisaun sira seluk, tanba ne’e estadu nafatin iha komitmentu atu kontinua apoiu Centro Chega!I.P iha futuru.
“So iha entidade ida propriu, entre atividade sira barak, mais Chega! konsege mosu hanesan entidade estadu nian ida, para tau asuntu rua ohin ne’e, iha espasu ne’ebé ke dignu, apropriadu, para atu estadu kontinua taumatan ba futuru”, nia deklara.
Estadu Timor-Leste kontinua fó apoiu ba Centro Chega!I.P tanba importante, atu fomenta ba inisiativa sira ne’ebé promove no salvaguarda patrimonia kulturál materiál i inmateriál ba ita nia memória koletiva. Maske iha buat barak mak Centro Chega!I.P seidauk halo, seidauk konkista, maibé nafatin iha komitmentu, iha lian portugués hateten “O caminho faz-se caminhando” katak dalan sempre iha para ita atu la’o.
Enkuantu, Centro Nacional Chega!I.P, Da Memória à Esperança (Centro Chega!) hamri’ik nu’udar institutu públiku ida mai ho nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”.
Centro Chega! nia misaun mak: “Harii sentru Pós-konflitu ne’ebé prezerva memória passadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memóriam Ad Spem, sira ne’ebé relevante”.
(Media CNC)