Centro Chega!I.P ho Universidade Udayana Bali Organiza Semináriu Internasionál

Bali – (21 Jullu 2026), Centro Nacional Chega!I.P ho Universidade Udayana – Bali liuhosi Fakuldade Siénsia Sosiais no Polítika (FSSP), Departamentu Siénsia Politika (DSP) hamutuk ho Konsuladu Timor-Leste iha Bali – Indonezia organiza Semináriu Internasionál ho tema “𝙋𝙧𝙚𝙨𝙚𝙧𝙫𝙞𝙣𝙜 𝙎𝙝𝙖𝙧𝙚𝙙 𝙈𝙚𝙢𝙤𝙧𝙮 𝙩𝙤 𝙎𝙩𝙧𝙚𝙣𝙜𝙩𝙝𝙚𝙣 𝙁𝙧𝙞𝙚𝙣𝙙𝙨𝙝𝙞𝙥 𝙏𝙤𝙬𝙖𝙧𝙙𝙨 𝙍𝙚𝙘𝙤𝙣𝙘𝙞𝙡𝙞𝙖𝙩𝙞𝙤𝙣” 𝙠𝙖 (𝙈𝙚𝙣𝙟𝙖𝙜𝙖 𝙈𝙚𝙢𝙤𝙧𝙞 𝘽𝙚𝙧𝙨𝙖𝙢𝙖 𝘿𝙚𝙢𝙞 𝙈𝙚𝙢𝙥𝙚𝙧𝙚𝙧𝙖𝙩 𝙋𝙚𝙧𝙨𝙖𝙝𝙖𝙗𝙖𝙩𝙖𝙣 𝙈𝙚𝙣𝙪𝙟𝙪 𝙍𝙚𝙠𝙤𝙣𝙨𝙞𝙡𝙞𝙖𝙨𝙞), ne’ebé hala’o iha salaun konferensia FSSP, Udayana-Bali.

Semanáriu ne’e ho objetivu atu sosializa informasaun kona-ba progresu implementasaun rekomendasaun sira hosi relatóriu (CAVR)-Chega! no (CVA)- Permemoriam Ad Spem (PMAS) hodi rona perspetiva akadémiku kona-ba kontribuisaun akademiku nian apoiu prosesu implementasaun rekomendasaun hosi relatoriu rua ne’e no buka mekanismu hamutuk hodi implementa rekomendasaun sira hosi relatóriu CAVR no CVA iha área Memória Koletiva no Rekonsiliasaun.

Semináriu Internasionál ne’e hahú ho diskursu bemvindo hosi Reitór Universidade Udayana Bali, Prof. Ir. I Ketut Sudarsana, S.T., Ph.D., Diskursu hosi Membru Konsellu Administrasaun Centro Chega!, Inocêncio de Jesus Xavier, Diskursu hosi Primeiru Sekretáriu Konsul Jerál Bali, Joel Maria da Costa.

Hafoin abertura, kontinua kedan ho aprezentasaun materia hosi oradór sira mak hanesan, Diretór Ezekutivu Centro Chega!, Hugo M. Fernandes ko’alia kona-ba “Implementasaun Rekomendasaun Chega! no PMAS – Progresu no Dezafiu”, Drs. I Ketut Putra Erawan, M.A., Ph.D. hosi Fakuldade Siénsia Sosiais no Polítika Univesidade Udayana ko’alia kona-ba “Rekomendasaun ba Prezervasaun Memória Koletiva no Promosaun Rekonsiliasaun entre Timor-Leste no Indonézia.

Aleinde ne’e iha mos deskusante sira ne’ebé fo sira nia perspetiva liuhosi sira nia intervensaun. Deskusante sira ne’e hanesan Dra. Atinike Nova Sujiro, Ketua Komisi Nasional Hak Asasi Manusia (Komnas HAM – Indonesia), ne’ebé Ko’alia kona-ba “Kontribuisaun hosi Rekomendasaun Chega! hodi Hametin Relasaun Fraternal Liuhosi Prosesu Rekonsiliasaun”, no Dr. Ivo Mateus Gonçalves da Cruz Fernandes, Akademista no istoriadór ne’ebé ko’alia kona-ba “Preserva Sustentabilidade Memória Koletiva”.

Diskusaun ne’ebé modera hosi Gede Indra Pranama, SIP.MA. no durante diskusaun la’o ho di’ak no interativu ho asuntu sira kona-ba narativa istória, reparasaun, rekonsiliasaun no memorializasaun, labarik lakon, interkambiu kultural inklui asuntu kooperasaun iha setór edukasaun.

Seminariu ne’e mos hetan partisipasaun maximu hosi Peskizador no sivitas akadémiku Udayana, Univesitariu, ativista Diretus Umanus, Timoroan nasionalidade Indonézia no grupu interesante balun.

Ikus hosi Semináriu ne’e mak, Parte Centro Chega! no Fakuldade Siénsia Polítika Asina Nota aranjamentu tekniku ne’ebé loke dalan ba diskusaun kona-ba koopersaun servisu institusional entre parte rua.

Media Chega!.