Dili – (23 Juñu 2026), Centro Nacional Chega!I.P ho Ministeriu Solidariedade Sosiál no Inkluzaun (MSSI) asina Nota Entendementu ka Memorandum of Understanding (MoU) hodi implementa rekomendasaun sira husi Relatóriu Finál Comissão de Acolhimento, Verdade e Reconciliação (CAVR)-Chega! no Comissão de Verdade e Amizade (CVA) – Per Memoriam Ad Spem (PMAS) liu-liu iha área asistensia sosiál ba sobrevivente sira no mos atu fo apoiu ba sobrevivente sira mais vulneravel.
Nota Entendementu entre Chega! ho MSSI asina refleta kompimisu estadu nian tuir Konstituisaun Repúblika Demokrátika Timor-Leste, iha artigu 11 ko’alia kona-ba rekoñese no garante protesaun espesiál ba sidadaun sira ne’ebé kontribui ba luta libertasaun nasionál.
Nota Entendementu ne’e sei validu durante tinan 3 ne’ebé foka ba área espesifiku sira mak hanesan, halo identifikasaun no apoiu ba sobrevivente sira iha situasaun vulnerave, Integrasaun benefisiáriu sira iha programa asisténsia sosiál MSSI nian, Dezenvolvimentu polítika no medida sira reparasaun sosiál nian, Promosaun ba inkluzaun sosiál no ekonómika benefisiáriu sira nian, no área sira seluk ne’ebé sei hetan akordu entre parte sira.
Dokumentus Ofisial ne’e asina husi Diretór Ezekutivu Centro Nacional Chega!I.P, Hugo Maria Fernandes no Ministra Solidariedade Sosiál no Inkluzaun (MSSI), Verônica das Dores, ne’ebé hala’o iha Salaun enkontru MSSI, Caicoli, Dili.
Iha oportunidade ne’e, Ministra Solidariedade Sosiál no Inkluzaun (MSSI), Verônica das Dores hateten katak, MSSI asina MoU ho Centro Chega!I.P iha área asisténsia sosiál nian no fo apoiu ba sobrevivente sira ne’ebé vulneravel.
“Ohin ita halo asinatura ho Chega! tanba ita boot sira hatene katak, nia (Chega!) servisu ba vitima pasadu. Vitima sira ne’ebé trauma pasadu hetan violasaun iha tempu okupasaun i to’o ohin loron. Governu iha komitmentu presiza tau matan”, dehan Ministra ba jornalista sira hafoin remata serimonia asina MoU.
Ministra haktuir, estadu no governu liu husi MSSI no Centro Chega!I.P presiza tebes apoiu sira tanba sira nu’udar vitima ba funu durante tinan 24 nia laran. “Tanba ne’e, lokraik ida ne’e lori hau nia naran, hau lori Ministeriu nia naran, hau lori Nuno Governu konstitusional nia naran, hau hato’o agradesiemntu ba hotu-hotu nia kontribuisaun to’o realiza atividade ne’e”, Ministra agradese.
Entertantu, Centro Nacional Chega!I.P kria hosi Dekretu-Lei No. 48/2016, loron 14 fulan-Dezembru, iha misaun atu promove memória, direitus umanus no solidariedade ho sobrevivente sira ne’ebé vulnerável liu. Enkuantu Ministériu Solidariedade Sosiál no Inkluzaun, tuir Dekretu-Lei No. 54/2023 husi loron 1 fulan-Setembru, mak departamentu governu nian ne’ebé responsavel ba dezeñu, implementasaun, no koordenasaun polítika sira asisténsia sosiál no protesaun nian. Enkuantu Programa Nuno Governu Konstitusionál fó prioridade ba apoiu ba populasaun vulneravel sira no promosaun ba inkluzaun sosiál.
Media Chega!.