Centro Chega!I.P ho FDCH Husu Bolseiru Sira Tenke Estuda Maka’as

Dili – (13 Marsu 2026), Centro Nacional Chega!I.P ho Fundu Dezenvolvimentu Kapitál Umanu (FDCH) husu bolseiru na’in 16 kompostu feto 13 no mane 3, ne’ebé hetan bolsu estudu atu estuda maka’as atu bele hetan valor di’ak.

Diretór Ezekutivu Centro Nacional Chega!I.P, Hugo Maria Fernandes iha diskursu fo énfaze kona-ba bolsu estudu ne’ebé bolseiru sira hetan la’os Centro Chega!I.P no Fundu Dezemvolvimentu Kapitál Umanu (FDCH) mak fo maibé ne’e estadu mak fo nu’udar rekoñesimentu estadu nian ba Inan Aman no Avo sira nia sofrementu ne’ebé hetan durante konflitu periodu 1974-1999.

“Bolsu estudu ne’e estadu mak fo tanba atu fo odra ba imi nia Inan Aman sira tanba sira lakon oportunidade hanesan ho imi, sira moris iha situasaun lahanesan ho imi. Imi simu imi tenke fo duni sentidu ida ondra, respeitu no dignifika sira nia sakrifisiu, sira nia partisipasaun hodi lori rai ne’e ba ukun rasik-an”, dehan Hugo iha serimonia asina kontratu apoiu subsidiu estudu ne’ebé hala’o iha Salaun Konferensia Centro Chega!I.P, Antigo Comarca Balide.

Diretór argumenta, bolsu estudu ne’ebé ita boot sira hetan tenke halo imi nia-an orgullu katak imi mos agora bele hanesan ho sosiedade sira seluk iha Timor-Leste, exemplu hanesan Membru Governu nia oan, Veteranu nia oan sira ne’ebé hetan bolsu estudu.

Nia sublina, “imi tenke hatur katak ne’e rekoñesimentu husi estadu. Ne’e la’os bolsu estudu ida husi maun Júlio, husi hau, la’os husi FDCH, la’os husi CNC ne’e bolsu estudu ida husi Estadu Republika Demokratika Timor-Leste”.

Tanba ne’e, nia husu ba bolseiru sira tenke eskola didi’ak no estuda didi’ak atu bele hetan valor di’ak. Labele sai hanesan bolseiru sira seluk ne’ebé mak hetan tiha bolsu estudu maibé laba eskola no laestuda hetan valor ne’ebé ladi’ak.

“Ida ne’e la’os halo tauk imi maibé ida ne’e sai nu’udar motivasaun ida. Motivasaun ida ba imi para depois imi bele ser duni orgullu, hau hetan bolsu ne’e merese tanba hau nia Inan Aman partisipa iha luta ida ne’e i estadu rekoñese luta ida ne’e”, Diretór fo hanoin.

Diretór mos hato’o parabens ba bolseiru sira tanba hetan ona oportunidade kontinua eskola, atu hadi’a liu-tan imi nia kapasidade no koñesimentu no espera katak ne’e nu’udar pasu primeiru ida atu oinsa tama iha sosiedade atu kontribui. Imi mos tenke sai mensajeiru ida ka embaixadór ida atu hateten katak “ami orgullu tanba estadu tau matan ba saida mak vitima hetan”.

Diretór Ezekutivu FDCH, Júlio Aparicio, husu ba bolseiru sira atu estuda maka’as tanba ne’e hanesan oportunidade ida tenke fo valor ba ita nia-an rasik, atu koree ita nia terus, kore ita nia terus la’os Governu, la’os CNC I.P la’os FDCH, no mos la’os Inan Aman no eskola, maibé ita rasik mak koree ita nia-an. Sira ne’e fasilita no hatudu de’it dalan.

“Hau husu ba ita boot sira estuda maka’as, ita boot sira mak ita boot sira nia terus ne’e, mukit ne’e, kiak ne’e la’os ema seluk. Se ita boot sira dependente ba ema seluk ema aproveita ita nia terus ne’e, ita nia susar, ita nia kiak ne’e, sira di’ak ba beibeik no ita terus ba beibeik” Diretór husu.

Reprezentante Bolseiru, Julieta Maria Freitas hato’o “agradese ba oportunidade, kompromete-an atu estuda maka’as no foti responsabilidade atu kontribui ba dezenvolvimentu rai laran. Ida ne’e oportunidade boot ida atu dezenvolve ami nia koñesimentu”.

Reprezentante Inan Aman, Marelia Alves Fernandes hateten, lori Inan Aman nia naran hato’o agradesimentu ba Centro Chega!I.P no FDCH ne’ebé mak fo ona bolsu estudu ba sira nia oan hodi kontinua estudu iha nivel ensinu superior. Nia mos husu ba oan sira (bolseiru) atu estuda did’ak hodi hetan susesu iha estudu.

Iha tinan 2022 to’o 2026 Centro Chega!I.P ho FDCH oferese ona bolsa estudu ba sobrevivente nia oan hamutuk nain 43, nain 4 mak gradua ona. Alende ne’e iha tInan 2025-2026 Centro Chega!I.P mos apoiu fInanseiru ba graduasaun ba sobrevivente nia oan hamutuk na’in 5.

Centro Chega! ho FDCH oferese bolsa estudu ba sobrevivente nia oan sira hodi asesu edukasaun iha nivel ensinu superior nu’udar garante ba sira nia jerasaun nia futuru di’ak tanba edukasaun nu’udar xave ba hadi’ak oportunidade husi povu nia moris, no hodi konkretiza no alkansa potensia hotu-hotu hodi hasa’e kresimentu ekonomia no desenvolvimento nasionál, ho vizaun mak, labarik hotu-hotu ba eskola no simu edukasaun ho kualidade no permite hodi sira hetan moris saudavel no produtivu kontribui ba dezenvolvimentu nasional.

Apoiu hirak ne’e, hatan ba Rekomendasaun Comissão de Acolhimento, Verdade e Reconciliação (CAVR)-Chega! nian, relasiona ho reparasaun ba Vítima konflitu politiku pasadu nian, ne’ebé husu ba Governu Timor-Leste hodi garantia moris di’ak ba povu ne’ebé sai vítima funu ba libertasaun patria durante tInan 24 nia laran. Rekomendasaun Chega! kona-ba “Reparasaun 12.12” ne’ebé husu ba governu/estadu Timor-Leste hodi fo bolsu estudu ba vitima sira nia oan ne’ebé mak seidauk bele asesu ba eskola, ensinu sekundária to’o ensinu superior tanba laiha kbi’it ba aspetu ekonomia.

Media Chega!.