Dili – Centro Nacional Chega!I.P asina ona akordu/kontratu servisu hamutuk ho Asosiasaun Vítima 1974 – 1999 no Assosiação dos Ex-Prisioneros Politico de Timor-Leste (ASSEPPOL – TL). Asinatura kontratu ne’e realiza Kinta-feira ohin (28 Janeiru 2021) iha Salaun Konferensia Centro Chega! Antigo Comarca Balide – Dili.
Akordu/kontratu entre Centro Chega! ho Asosiasaun Vítima no ASSEPPOL-TL ne’e bazeia ba enkuadramentu legál no rejime jurídiku aplikavel iha misaun no atribuisaun sira Centro Chega! nian tuir Decreto Lei nú. 48/2016 kona-ba Kria Centro Nacional Chega!I.P da Memória á Esperança no mós koresponde ba Programa VIII Governu Konstitusionál.
Akordu ne’e liu-liu kona-ba Apoiu Fundu Operasionál ba Asosiasaun rua hodi halo programa no atividade sira atu fó asistensia ba Vítima/Sobrevivente sira husi 1974 – 1999, nune’e mós ba Ex-Prizioneiru Politiku sira.
Akordu/kontratu ne’e asina husi Diretór Ezekutivu Centro Chega! Sr. Hugo Maria Fernandes ho Koordenadór Asosiasaun Vítima Sr. Domingos P. Araujo Moniz no Diretór Ezekutivu ASSEPPOL Sr. Martinho Rodrigues Pereira.