Oekuse – (12 Abril 2024), Centro Nacional Chega! Instituto Publiku (CNC I.P) liu husi Divizaun Relasaun Externa Komunikasaun no Advokasia (DREKA) hala’o atividade diseminasaun relatóriu Chega!, CVA (Comição Verdade e Amizade) no Papel Centro Chega! ba autoridade lokal no komunidade sira iha Postu Administrativu Pasabe, Rejiaun Administrativu Espesial Oekuse Ambeno (RAEOA).
Administradór Postu Administrativu Pasabe, Paulino Marques informa, nia agradese tebes ba Centro Chega! tanba bele mai to’o Postu Pasabe hodi hala’o atividade diseminasaun relatóriu Chega!, CVA no Papel Centro Chega! ba autoridade lokal no komunidade sira.
“Ami agradese tebes ba atividade ne’e, ami espera katak ba futuru presiza kontinua hala’o liu-liu ba eskola sira no mos organizasaun foinsa’e sira atu bele hetan koñesimentu kona-ba relatóriu Chega!,” dehan Administradór Postu iha diskursu abertura atividade diseminasaun, iha Pasabe, RAEOA, Sexta-feira (12 Abril 2024).
Nia mos husu ba Centro Chega! atu halo identifikasaun ba vitima no sobrevivente sira atu bele hetan rekoñesimentu husi estadu tanba to’o ohin loron sira seidauk hetan apoiu husi entidade estadu.
Iha biban ne’e, Xefe Suku Abani, Carlos Elo konsidera, atividade diseminasaun ne’e importante tebes tanba liu husi informasaun ne’e bele aumenta sira nia koñesimentu kona-ba istória pasadu no sira nia kontribuisaun kuta ba ukun rasik-an.
“Hau nia haree ba atividade diseminasaun ida ne’e hau sente kontente los ho programa ida ne’e tanba bele mai disemina informasaun ba komunidade iha suku Abani. Tanba balun seidauk iha koñesimentu klean,” nia esplika.
Xefe Suku Malelat, Jose Martins reforsa, atividade diseminasaun ne’e di’ak tebtebes tanba iha sira iha postu Pasabe dalabarak ema balun mos terus ba rai ida ne’e tanba defende ukun rasik-an. istoria ne’e importante tanba Timor-Leste hetan ona ukun rasik-an.
Diretór Divizaun Relasaun Externa Komunikasaun no Advokasia (DREKA), Gaudencio Soares Souza informa, atividade diseminasaun ne’e nudar atividade regular Centro Chega! nian atu kontinua fahe informasaun liga ho relatoriu Chega!, CVA no papel Centro Chega! bazeia ba dekretu lei nomeru 48/2016.
Objetivu mak lori fali relatoriu rua ne’e ba komunidade sira atu hasae komunidade sira nia koñesimentu kona-ba memoria pasadu inklui atividade sira seluk halo advokasia hamutuk kona-ba oinsa estadu bele implementa rekomendasaun sira mai husi vitima no populasaun sira iha Timor-Leste no iha Pasabe durante periosu CAVR nia tempu.
Hakerek inan aman sira nia istoria sai hanesan baze referensia ba peskizador sira atu halo peskiza no mos liu husi hakerek inan aman sira nia istoria para ema fo respeitu ba inan aman sira saida mak halo ona iha tempu pasadu tanba ita nia luta ne’e luta popular.
Enkuantu, atividade diseminasaun ne’e hala’o iha RAEOA liu-liu iha Sentru Juventude, iha Postu Administrativu Pasabe, Oesilu no Nitibe. Enkunatu, atividade ne’e partisipa Amo paroquia São João Paulo Pasabe, Komandante Eskuadra PNTL Pasabe, Diretór Eskola Bazika, Autoridade loka no komunidade sira.
(Media CNC)