Atividade Feira Livru Durante Loron 2 Iha Centro Chega! La’o Ho Susesu

Dili – (12 Marsu 2026), Centro Nacional Chega!.I.P parseria ho Movimentu Letras, Sala Leitura Xanana Gusmão, Abut, Tio Publising no Comite Orentador 25 (CO25) organiza Feira Livru, iha ámbitu Komemorasaun Loron Nasional Veteranus ba dala-9, ne’ebé hala’o durante loron rua 2 hahu iha Kuarta-feira to’o Kinta-Feira, (11-12 Marsu 2026), iha Antigo Comarca Balide.

Atividade ne’e kompleta ho, Feira Livru, Diskusaun Livru, Human Library no Story Telling. Iha parte diskusaun livru nian ho oradór sira mak hanesan Sr. Aniceto Guro-Berteni Neves aprezenta kona-ba Livru “Biografia Francisco Xavier do Amaral” no Sr. Yazalde Manaca Savio aprezenta kona-ba Livru “Poezia Resistensia”.

Atividade hirak ne’e la’o di’ak ho susesu no hetan partisipasaun maximu husi Estudante Ensinu Sekundariu Jerál hanesan Eskola Sekundaria Jeral 4 Setembru UNAMET, Eskola Sekundariu Jeral Oriental Timor Lorosa’e (ESJOTL), Eskola Sekundaria Jeral AN’NUR no mos Universitáriu sira husi Universidade Nacional Timor Lorosa’e (UNTL), Instituto Superior Cristal (ISC), Universidade da Paz (UNPAZ), Instituto Of Buissnes (IOB) no Dili Instituto of Thecnology (DIT), ho total partisipate hamutuk 254.

Iha diskursu abertura, Diretór Ezekutivu Centro Nacional Chega!I.P, Hugo Maria Fernandes destaka importansia husi atividade Feira Livru ne’e, ne’ebé kompleta ho atividade oin-oin hanesan atividade diskusaun livru, human library no story telling.

Atividade hirak ne’e hala’o ho objetivu atu promove kultura lee, kria espasu ba dialogu no diskusaun. Kriasaun espasu ba komunidade sira atu asesu livru. Promove kultura leitura no mos promove livru oin-oin kona-ba istória, direitus umanus, paz no rekonsilisaun.

Diretór afirma, iha feira ne’e, iha livru barak, ita halo leitura ba livru la’os lee de’it por liafuan sira, frazes sira, maibé halo leitura ho komunikasaun ho livru ne’e. Ita lee livru ne’e la’os ita mesak mak lee maibé ita kestiona tanba sa? mak hanesan ne’e. Ida ne’e mak halo ita komprende lalais liu. Iha eventu sira hanesan ne’e halo ita iha koñesimentu atu lee ho didi’ak.

“Diskusaun livru lori imi nani no luku klean liu tan kona-ba saida mak livru ida hakerek. Aspeitu saida de’t mak ita tenke konsidera. Dalaruma ema hanoin lee livru, kaer livru ida ne’e lee, maibé lee ho didi’ak, lee halo komunikasaun halo dialogu ho livru. Ida ne’e mak ita halo bele intende fasil liu duke ita lee literariamente de’it kona-ba livru ida”, dehan Diretór Chega iha diskursu abertura atividade Feira Livru iha Chega!.

Iha oporunidade hanesan, Estudante Instituto Superior Cristal (ISC), Cornelio Araujo Martins hatete, nia parte sente kontente hodi partisipa iha atividade Feira Livru ne’e tanba bele aumenta sira nia koñesimentu. Nia rekomenda ba oin, Centro Chega!I.P kontinua organiza atividade ne’e.

Nune’e mos, Estudante Universidade Nacional Timor Lorosa’e (UNTL), Florenzio B. da Silva esplika, atividade Feira Livru ne’e di’ak no kapas tebes tanba iha atividade oin-oin hanesan diskusaun livru, human library no story telling.

Feira Livru hola parte iha atividade Centro Chega!l.P liu husi Divizaun Edukasaun no Formasaun (DEF) nian, iha atividade Jestaun Biblioteka ho nia knaar prinsipal ida mak atu promove Biblioteka Centro Chega!I.P nu’udar sentru sabedoria ida ne’ebé asesível ba ema hotu liu-liu foinsa’e ka estudante hodi hatene kona-ba istória no memória pasadu Timoroan nian ne’ebé mak prezerva iha Centro Chega!I.P.

Entertantu, atividade hirak ne’e hala’o hodi hatan ba mandatu Centro Chega!I.P nian ho baze ba dekretu lei Nu. 48/2016 katak kontinua hala’o nafatin ba servisu sira ne’ebé Comissão de Acolhimento, Verdade e Reconciliação (CAVR) no Comissão Verdade e Amizade (CVA) hala’o tiha ona. Vizaun mak prezerva memória pasadu nian nu’udar lisaun ba Povu Timor-Leste no umanidade tomak hodi hetan dame. Misaun mak hari’i sentru póz-konflitu ne’ebé prezerva memória pasadu nian hodi promove direitu no valor umanu; Hari’i parseria nasional no internasional hodi reforsa rede servisu sira atu implementa rekomendasaun CAVR no CVA ne’ebé relevante.

Media Chega!.