Maliana – (15 Novembru 2023), Relasiona ho Festivál Fronteira 2023 ne’ebé organiza husi Centro Nacional Chega!I.P, Sekretáriu Estadu Arte no Kultura (SEAK), Ministru Juventude Desportu Arte no Kultura (MJDAK) durante loron tolu (15-18 Novembru 2023) nu’udar maneira ida atu hametin fraternidade umanu.
Administradór Munisipiu Belu, Agustinus Taolin, agradese ba Governu Timor-Leste ne’ebé organiza Festivál Fronteira 2023 ho tema “Interkambiu Kulturál ba Hametin Rekonsiliasaun” no konvida ona sira partisipa iha Festivál ne’e.
Administradór haktuir, “atividade festivál fronteira 2023 ne’e importante tebes tanbá mai ho objetivu atu kria unidade, hametin fila-fali lasu fraternidade no amizade entre povu no nasaun rua ne’e, Timor-Leste no Indonézia espesialmente komunidade Nusa Tenggara Timur (NTT) liu-liu komunidade sira iha liña fronteira hanesan Malaka, Timor Tengah Utara (TTU) no Belu”.
Timor-Leste no Nusa Tenggarah Timur (NTT) kompostu husi Belu no Malaka ita mesak Timoroan de’it, mesak maun ho alin, inan ida, aman ida, uma lisan ida, kultura ida mai husi inan ida husar talin ida.
“Ita hotu-hotu ne’e Timoroa de’it. Kabupaten Belu no Malaka Nusa Tenggarah Timur espesialmente ra’i Timor, kria amizade nu’udar maun alin, ita husar ida, binan ida”, Administradór Belu esplika.
Ita nu’udar maun ho alin, nia argumenta, faktus ne’e ita haree liu husi aprezentasaun dansa kultura entre nasaun rua, Timor-Leste no Nusa Tenggarah Timur (NTT)-Indonézia hatudu dansa kultura hamutuk iha palku.
“Ami kontente, hakarak hato’o obrigado ba Governu Timor-Leste ne’ebé konvida ona ami. No ami nia esperansa katak husi tempu ba tempu ne’ebé sei mai, ami mos sei hala’o atividade hanesan iha liña fronteira, Kabupaten Belu, Malaka no NTT, hamutuk ho komunidade Timor-Leste”, nia garante.
Liu husi Festivál Fronteira ne’e, Administradór Munisipiu Belu ho espera katak, ita-nia amizade ne’e bele kontinua nafatin, ita kontinua hametin ita nia amizade ne’e ba oin, sai komunidade ida, oan rai Timor husar ida, inan ida, fo neon ba malu, fo laran ba malu.
(Media CNC)